ZVONČARI

“Od početka spravjanja štorij, ča san počela delat pred čuda let, nabralo jih se puno, a opeta je to samo mići del od onega ča bi trebalo zapisat va jenoj drugoj novoj knjige, da ih se ne pozabi” – piše Dragica Zvjezdana Stanić.


 

ZVONČARI

               Ive Jardas je zapisal da su ofčari na mlado leto kretali z ofcami va goru. Nase bi stavili ofčju kožu, maškaru na glavu,  okole pasa zvonci od blaga i takovi su hodili  z ofcami. Štrigi bi njih gledale i tako ne bi naškodile ofcan.

Još vavek se poveda da su va ovi kraji nahrupili Tatari, a kašneje i Turci. Provalili su i na Gromiško polje. Judi, ki su najveć bili ofčari, nisu imeli s čen se obranit. Da jih zastraše, ogrnuli su se z ovčjemi kožami, okol pasa špagi su vezali zvonci od blaga, na glavu su nabandali maškaru. V jenoj ruke su držali sekiru (baltu, prema tur. znači sekira) i držali je vajer i š njun mahali i pretili. Va drugoj su imeli popel kega su okole rasipali. Jako su juhuhali, skakali, zijali i zvonci lupali. Turki nisu znali ča je to, ča su te narugi pak su se jako prestrašili i pobegli.

Tumači se i veruje da su zvončari nastali va pretkršćansko vreme i običaji kad su se tirali zločesti duhi po zime i prizivalo mlado leto. Kad se priroda zbudi zvončaron prestaje njiho delo i oni se umire do druge zimi. Ti su se običaji, danas naše užanci, održali do danas.

Zvončari na glave nimaju si jednake maškari. Neki nose klobuk z rožicami, krabujosnicu, mej kemi je zelenilo od šparužini al od jelvice i s tri al pet šib na keh su storeni pupki kako da j drevo zbrukvalo (Zvoneća, Mučići, Rukavac, Brgud, Vlahov Breg i Korensko, Pobri, Frlanija). Drugi imaju maškaru z senjalon od blaga (Halubje, Zamet i Grobnik), a neken s kumaraka na se strani vise kurdelice va koloreh (Žejane i Mune). Kunpanija zvončari kot i maškar sobun zame maj okrunjen z rožicami al šaremi kurdelicami s ken spreda na široko mašu. Okol pasa zvončari imaju špagon vezani zvonci, neki samo jedan veli zvonac, a najveć njih ima po tri zvonci po čen se i zvončari mej sobun raspoznavaju. Razliku mej njimi čuje se i va ten kako zvone, a kanpananje zvonac je vavek onakovo kakov je i sam hod zvončara. Reču da se zvončari rivaju, udrivaju, skaču i poskakuju. Si va ruke nose baltu, bačuku al mačuku, kako se va ken sele zove. To more bit drvena sabja al sekira, more bit boća al ki drugi zvončarski senjal. Najverovatneje je da j senjal plodnosti i kad zvončari z popelon posipaju divojki i ženi.

Saša Dmitrović piše da je ta užanca prežitak keltskeh i drugeh miti i obredi ča su jih grčka i rimska civilizacija prehitile va svoje religije, a pokla ih je nasledila i na svoj mod zela i Crekav pak je karneval ono vreme kada se pastve prej korizmi pušća malo slobodi. Od onda na daje, jist će se samo bakalar ale intrada (povrće). Popel je va kršćanstven senjal pokori i preobraćenja. Na Čistu sredu al Pepelnicu s kun pošne vreme korizmi, popel se stavja juden na čelo kod senjal pokorničkega vremena strogega posta. Na ta dan va crekve pop na maše posipa z popelon i govori: „Spameti se čovječe da si prah i da ćeš prah postat.“

Zvončari i danaska za vreme Pusta pohajaju i obahajaju mesta po Kastafšćine i okole. Oni kako i nekada na glave nose maškari, ke su storene kot glava od blaga, najveć z rogi, a lepo je videt i oneh ki nose klobuk okrunjen z rožicami. Zvončari let i let vavek hode po isteh puteh i jušto se zna kade njin je počivalo, a kade jih čeka neš za okrepit se. Tu onda store zvončarsko kolo i s ten poštimaju kuću, parona al celo selo.


štrigi
– vještice; maškara – maska; vajer – uvis; naruga – grdoba; užanca – običaj; zbrukvalo – propupalo; krabujosnica, kumarak – maska za glavu; kurdelice – trake; obahajaju – obilaze

(Po zapise Ive Jardasa, Franjota Šepića Bertinega i Saše Dmitrovića)

LEAVE A REPLY

Please enter your comment!
Please enter your name here