“Na kapitanovoj večere” je prva od nekoliko “Štorija z Kastafšćine i okole” koje ćemo objaviti na stranicama našeg portala. Autorica knjige Dragica Zvjezdana Stanić, osim što je mnoge generacije djece podučila i privukla domaćoj besede, ovom knjigom mnoge stare štorije čuva od zaborava i čini ih dostupnijima svima, ne samo djeci.
—–
NA KAPITANOVOJ VEČERE
Va Kastve se j z leta va leto ponavjalo da tamošnji kapitan na blagdan Sveta tri kralja pozove h sebe na večeru gradskega plovana al kapelana i najstareju gospodu z grada. Tu su se veselili, jili i pili i jedan drugemu fanjski nazdravjali pak su neki šli doma i na klimaveh nogah.
Nekad je bila i užanca da kad se tako lepo najedu i napiju, kad se fini i kad krenu doma, najstareja gospoda posedu gradskega kapelana na kantridu i tako ga nose doma. To j za njega bila posebna čast.
Kad su tako jeno leto oteli doma nosit kapelana, oni ki su ga nosili bili su fanj veseli tako da su i sami sebe slabo nosili. Vino njin je vas svet zavrtelo pak su kantridu s kapelanon na skalineh zvrnuli. Na smrt se j razbil. Kad je na se prišal, z propovedalnice njin je dobru prediku držal sporad njihega pijanstva. On tu večer ni vino pil. Predikal je ča se pijanstvo stori i da je opasno za oče i nogi i da je vino nezahvalan gost. Ča ga se više pije, to manje paze oni ki ga piju.
Od te nesreći se kapelana ne nosi doma. Ne trebe mu takova klimava čast. Ale se je i daje držala užanca da kapetan gradsku gospodu pozove na Sveta tri kralja na večeru pa se i kapelan pridruži.
fanjski – često; šli – išli; na klimaveh nogah – na klimavim nogama, napiti; užanca – običaj; kantrida – stolica; oteli – htjeli; zvrnuli – izvrnuli
(Po zapise Johanna Weisharda Valvasora)
